RUALBANLOTE NGAIHSAK

10/11/2012 14:21

• Rev. Lalpianthara, Tahan

Exo. 4:11, Jh. 9:1-3

...Mihring ka hi tu siam nge ni a, ṭawng thei lo te, bengngawng te, mit var te, mitdel te pawh hi tu tih nge ni? Kei LALPA hian a ni lo vem ni?

Pianphunga rualbanlote ngaihsak

Rualbanlo tih awmzia hi mi pangngai pha lo leh mihring nih phung pangngai luah zo lote ti ila, a sual tam awm love. Tunlaiah chuan ‘mi danglam bik te, tih theih danglam tak neite’ tiin an sawi ṭhin. A chhan chu rualban lova kan ngaihte hian talent ṭha tak tak, mi pangngaiten an neih ve loh an neih vang a ni. Khaw tin leh kohhran hrang hrangah hian pianphunga rualbanlote hmuh tur an awm a, hengte hian Pathian chatuan remruatnaa mihringte tel ve loh zia a tilang a, Pathian an ti ropui bawk. Pianphunga rualbanlote hi Pathianin duh taka a siam leh a ropuina puanchhuahna tura a siamte an ni tih hi kohhran leh khawtlang hian kan ngaihtuah ngai em?

Piangphunga rualbanlote hian ngaihsaktu leh hmangaihtu an mamawh a, engkima Pathian ṭhatna leh malsawmna dawng ve tura an rawngbawlsak hi kohhranhote mawhphurhna a ni. Mi tam tak chuan piangphunga rualbanlote hi kan hmusitin kan tiduhdah ṭhin a, a pawi hle a ni. Mite pian sualna leh pianphung an danglamna hmusittu leh an tih dan zira endawngtute chuan a siamtu Pathian a hmusit tel tih pawh hriat a ṭha hle. Ṭawngthei lo te, mitdel te, bengngawng leh mitdelte siamtu chu Pathian a ni a, Pathian hian pianphunga rualbanlote hmangin a ropuina a lo puang tawh ṭhin a, a puang mek bawk a, a la puang zel dawn a ni. Chuvangin pianphunga rualbanlote ngaihsak hi kohhranhoten inzirtir thar kan mamawh a, pulpit sermonah pawh hman ṭhin a ṭha khawp mai. Chhungkuaah pawh piangphunga rualbanlote hmusit lo tur leh chhawnchhaih lo tura inzirtir tam a ṭha hle.

Rilru lama rualbanlote ngaihsak

Rualbanlote kan ngaihsakna tur pawimawh tak pakhat chu rilru lama rualbanlote hi an ni. Piangphunga danglamna nei lo, rilru lam erawh mi pangngai pha chiah lote hian mite hmuhsitna, chhawnchhaihna leh tihduhdahna an tuar nasa ṭhin hle a ni. Chhungkaw zinga heti ang mi neite tan chuan mite hmusitna ṭawngkam leh chhawnchhaih dan hriat hian rilru a na thei em em a ni. Chuvangin rilru lama rualbanlote ngaihsak leh hmangaih kawngah inzir thar kan mamawh hle. Khaw ṭhenkhatah chuan ṭhalaite zingah chauh ni lovin nu leh pate zingah pawh heti ang mi hmuhsit ching kan awm nual. Ka ṭhian pakhatin min hrilh chu “keini khua chu mite biak chhawhchhi, chhawnchhai leh bawl kan hmang lutuka mi pangngai tak tur pawh mi ang lo-ah an chhuak ṭhin,” a ti. A sawi zawm zelnaah chuan ‘saw pa... pawh saw kan khuaah chuan awm lo se, tun ang em em a ni lovanga, ...a ni pawh khi kan khuaah chuan awm se tuna a dinhmun hi a pha loving,’ a ti!

Hei hian rilru lama rualbanlote hi kan enkawl dan a zirin an danglam thei tih a entir a, enkawlna a ṭhat chuan dinhmun sang takah a hruai thei a, a ṭhat loh erawh chuan an nih tur ang an nih pha lo fo ṭhin. Dik tak chuan mi pangngai takte pawh hi miin min be chhawhchhiin min bawl reng ṭhin sela chuan rualbanlo dinhmunah kan ding ve thei ngei ang. Engpawhnise, heti anga mite danglamna hmuhsit ṭhintute hian a lo dawngsawngtu rilru tur leh an chhungte rilru tur ngaihtuah fo a pawimawh. Isuan, “Miin i chunga an tiha i duh tur ang apiang chu mi chungah pawh ti ve rawh’ a ti (Matt. 7:12).           

Rilru lama rualbanlote hi mahni inah an awm reng thei bik lova, puipunna leh thil tihhona hrang hrangah an tel ve ṭhin a, chhungte thu hrilh aiin pawn lama mite thu sawi hi an awih zawk emaw tih turin an awm fo. Chuvangin kohhran leh khawtlangte hian rilru lama rualbanlote enkawl kawngah an thlen chin aṭanga hmasawnna nei turin hmangaih tak leh duhsakna rilru nen kan enkawl a pawimawh hle. Mite danglamna leh rualbanlohna hmusita fiamthu thawh nan leh dik lo taka thu hrilhtu kan nih chuan anmahni leh an chhungte rilru kan tihnatna rah chu kan damchhunga kan seng hman lo a nih pawhin kan fate emaw, kan tute chungah emaw a thlen pawh a rinhlelhawm loh a ni.

Nunphunga rualbanlote ngaihsak       

Nunphunga rualbanlo han tih hian sawi dan hrang hrang a awm thei ngei ang. Mi ṭhenkhat chu engemaw harsatna avangin mihring nunphung pangngai pha lova, dinhmun hniam takah an awm a, chuti anga dinhmun chhe taka dingte ngaihsak leh ṭanpui chu he thupuiin a tum chu a ni. Mahni duh vang ni lova, vanduaina avanga rethei tak leh harsa taka awm te, rahbeha awm te leh ṭhenrual pawh kawm hlei thei lo khawpa mi rethei kohhran ho zingah tam tak an awm a ni. Chuti anga nunphunga rualbanlote chhanchhuah hna leh chhawmdawl hna chu kohhranhote mawhphurhna leh rawngbawlna tur dik tak a ni.

Nunphunga rualbanlote ngaihsak a, an harsatna lak aṭanga hruaichhuahna kawngah kohhrante harh thar a ṭulin a pawimawh hle. Mihring nunphung pangngai pela khawsa ṭhinte leh Kristian lo ang maia chungchuang taka nung ṭhinte pawhin mihring nunphung pangngaia an khawsak theihna tura rawngbawl pawh a ṭul a ni. Engpawh nise, harsatna chi hrang hrang avanga mihring dinhmun ngai luah thei lo khawpa retheite leh mangangte ngaihsak leh chhanchhuah chu kohhran rawngbawlna tur a ni. Lalpa chuan “thinglung lungchhiate tuam tur te, salte hnena chhuahna thu sawi tur leh mi tangte hnena tan in hawnna thu sawi tur te, lungngai zawng zawng thlamuan turin,” min ko si a (Isaia 61:1-3).

Thlarauva rualbanlote ngaihsak

Thlarau lama rualbanlote chu eng ang mite nge ni ang? Heta thlarau lama rualbanlo kan tih ber chu piangthar lo, Krista nena inzawmna nei lo leh Pathian leh a kohhranhote ngaihsak lo mite ti ila a sual tam awm love. Heti ang mite hi kohhran tin hian kan kawl ṭheuh a, mite ruala Pathian an fak ve theihna tur leh Isuaa thlamuanna an chan ve theihna tura rawngbawl leh ngaihsak hi kohhrante tih tur a ni. Kohhrana member punna tur a nih chuan nasa takin kan ṭang a, mi sadai ṭhiah pawh kan pawi ti lo. Kohhrana member punnaa kan lawma Pathian pawh lawm ve tura kan rin chuan van lam member punnaah chuan eng ang takin Pathian hi lawm ang maw! Hmuh theih kohhran ṭhanna tur leh hmasawna tura nun thapa kan inpe phal a nih chuan hmuh theih loh kohhran tan phei chuan nasa lehzuala rawngbawl tur kan ni. Van nun neia thlarau lama rualban kan tam chuan Pathian ram pe tam tur leh thilpek pe tam tura kohhranhote nawr reng hi a ṭul tawh dawn lo a ni. Tunah chuan a bul ber Krista nun an la neih loh avangin an la uikawm rih a, thilpek lamah pawh kan la chak lo mai a ni. Chuvangin thlarau lama rualbanlote kan ngaihsak a, an saltanna lak aṭanga kan hruaichhuah chuan kohhrante kan hlim ang a, thilpek pawh a pung dawn a ni.

Tin, kohhran hruaitu leh rawngbawltute zingah pawh hian thlarau lama rualban loh hi a la awm theih cheu mai. A chhan chu hruaitu leh rawngbawltu tam tak kan thlante hi thlarau lama mitvar lo, mihring nihnaa mi fel leh sakhaw mi ṭha an tih zing aṭanga kan thlan tlin tam tak an awm. Mi ṭhenkhat phei chu hausak vang leh thil phal avang te, politics avanga rawngbawltu leh hruaitu dinhmuna ding pawh an awm niin a lang. Chuvangin memberte thlarau nun mamawh chawm thei lo leh kohhran vei lova mahni hlawkna tur leh ropuina tur chauh ngaihtuah ṭhin rawngbawltu pawh kan pung zel a ni. Isuan, “Mitdelin mitdel vek a hruai chuan khuarkhurumah an tla dun ang” a ti a, hruaitu mitdel zingah kan tel ang tih a hlauhawm hle. Memberte Pathian thua an tui em em laia tuipui pha lova, sawipui thei lo leh thlarau bo vei lo rawngbawltu hi eng zat tak awm ang maw! Mahni ngaihdan chauhva kohhran hruai tum a, mahni duh dan anga rorel a nih loh chuan kohhrana nawrh leh tih tauh ching Upa leh rawngbawltu pawh kan ṭhahnem sawt hle. Pianphung leh rilru lama rualbanlo aiin thlarau lama rualbanlo, Isuaa nun thar neihna tura Pathian thutak varpawh pha lo  nih a hlauhawm zawk. Chuvangin member zawng zawngte hlim taka Pathian kan fak theihna tur leh inremna thinlung nei a, lungrual taka rawngbawlho thei turin thlarau lama rualbanlote ngaihsak leh an saltanna lak aṭanga chhanchhuah hi kohhrante rawngbawlna tur pawimawh tak a ni.

Tlangkawmna

Rualbanlote hian Isua rawngbawlnaah hmun pawimawh tak an chang a, a thilmak tih tamna ber pawh rualbanlote zingah a ni. Chhungkuaa rualbanlo an awmin mihring chuan a chhan a zawng ṭhin a, Pathian laka vui mai palh a awl thei hle. Kan Bible chang tarlanah khian pianphung leh rilru lama danglam bikte pawh Pathian siam an ni a, piantirh aṭang mitdel chungchanga a mitdel chhan Isua an zawh pawh khan ‘tu vang mah a ni lova, a chunga Pathian ropuina tihlanna tur a ni zawk’ tiin a chhang a nih kha. Kan chhungkuaah rualbanlo kan nei a nih chuan ‘Pathianin rualbanlote enkawl thei turah min ngai a, min ring tawk hi a va ropui ve’ tia Pathian hnena lawmthu sawi hi kan hlimna tur a ni. A chunga rualbanlo chi hrang hrang kan sawite hian Pathian hmangaihna an chan theihna tur leh an saltanna lak aṭanga hruai chhuak a, an thlenchin aṭanga hmasawn turin kohhrante i thawk chhuak ang u. Lalpa’n malsawm rawh se.

Back